ខ្ទឹមស Garlic

ខ្ទឹមស

      I.        ទូទៅ

     ខ្ទឹមស ជារុក្ខជាតិមើមទី២ ដែលប្រជាជនទូទាំងពិភពលោកនិយមប្រើប្រាស់ បន្ទាប់ពីខ្ទឹមបារាំង និងត្រូវបានគេប្រើប្រាស់ជាយូរណាស់មកហើយសម្រាប់ជាគ្រឿងទេស និងឱសថ ។ ប្រជាជនចិន ឥណ្ឌា អេស្ស៊ីប បានប្រើតាំងពី ៤០០០ឆ្នាំមុន មកហើយ។ ខ្ទឹមស អាចមានប្រភពមកពីតំបន់អាស៊ីភាគកណ្តាល និងអ៊ឺរ៉ុបភាគខាងត្បូង ជាពិសេសតំបន់មេឌីទែរ៉ានេ ។ ប្រភពផ្សេងទៀតបានលើកឡើងថា មានតំបន់មួយក្នុងទ្វីបអាស៊ីកណ្តាល ដែលមនុស្សជំនាន់ដើមនៅទីនោះ បានពង្រាយពូជរបស់វាទៅកាន់តំបន់មេឌីទែរ៉ានេ ។
 

     ខ្ទឹមស ត្រូវបានបញ្ចូនទៅកាន់លោកខាងលិចតាមរយៈជនជាតិ អេស្ប៉ាញ ព័រទុយហ្កាល និងបារាំង ។ មើមខ្ទឹម ជាផ្នែកដែលគេប្រើប្រាស់ ។ ក្នុងមួយមើមមានច្រើនកំពិស ។ វាប្រើសម្រាប់ធ្វើម្ហូប ជាគ្រឿងទេស ហើយវាមានលក្ខណៈហាងខ្លាំង រសជាតិហឹរ និងផ្អែម ។

ខ្ទឹមស ត្រូវបានគេដាំទូទាំងពិភពលោក គ្រប់រដូវកាល និងគ្រប់សីតុណ្ហភាពទាំងអស់ក្នុងតំបន់ត្រូពិច ។

     តាមទិន្នន័យផលិតភាពរបស់ពិភពលោកកាលពីឆ្នាំ ២០០៨ បានបង្ហាញថា ប្រទេសដែលផលិតខ្ទឹមស បានច្រើនជាងគេនោះគឺ ប្រទេសចិន(១២.៥លានតោន) ឥណ្ឌា (០.៦លានតោន) (កូរ៉េ ០.៣លានតោន) អេស្ស៊ីប រូស៊ី អាមេរិច មីយ៉ាន់ម៉ា បង់ក្លាដេស ជាដើម។

    II.        លក្ខណៈគីមី

     ខ្ទឹមស សម្បូរទៅដោយអាហារូបត្ថម្ភច្រើន បើធៀបជាមួយរុក្ខជាតិមើមដ៏ទៃទៀត ។ អាហារូបត្ថម្ភទាំងនោះមានដូចជា ប្រូតេអ៊ីន ផូស្វរ ប៉ូតាស្យូម កាល់ស្យូម ម៉ាញេស្យូម និងកាបូនអ៊ីដ្រាត ។ ក្នុងខ្ទឹមស ក៏ផ្ទុកសារធាតុ ស៊ុលផ្វរ ផងដែរ ជាហេតុធ្វើឲ្យវាមានក្លិន និងរសជាតិហាង។